BAGUIO CITY- Nainget nga agsansanay ita ni reigning Philippine super featherweight champion Carlo Magali tapno kalabanenna ti agdama a World Boxing Association (WBA) Asia super featherweight champion a ni Charly Suarez iti “The Flash Grand Ballroom” ti Elorde Sports Complex sadiay Paranaque City inton Oktobre 23.
Sigun iti pinoy champion, dakkel a karit daytoy iti karerana agsipud ta sigud a miembro ti Philippine Boxing Team ni Suarez a nakipartisipar iti nagduduma a tournament iti ballasiw-taaw.
Ni Magali ket nagrugin a nagpakondisyon ken nag-ensayo idi pay Hunyo agsipud ta naituding kuma a makasangona ni Ayanda Nkosi sadiay South Africa idi Agosto 21 ngem saan a natuloy.
Mangnamnama ti 35-anyos a boksingero manipud Talibon, Bohol nga agbalin a bentahena ti ad-ado a kapadasanna iti professional level nu sadino adu ti inabakna a sigud a world champions.
Nasuroken iti sangapulo a tawen a nakabase ni Magali sadiay La Trinidad, Benguet ken maysa daytoy kadagiti mabigbigbig a boksingero ti nalatak nga international boxing promoter ken Cordilleran matchmaker a ni Brico Santig.
Ti boksingero ket mabigbigbig metlang kas “The Ferocious”, sigud nga International Boxing Federation (IBF) Pan Pacific super featherweight ken Oriental and Pacific Boxing Federation champion.
Addaan daytoy ti 25 a pangabak babaen iti 13 a knockouts ken 13 a panakaabak.
Kabayatanna, ti makalaban daytoy a ni Suarez ket sigud nga Olympian a limmaban iti 2016 Summer Olympics ken undefeated iti sangapulo ket dua a professional bouts./JrTablac
