Baguio City- Dumanon iti agarup tallo pulo a boksingero ti manamnama a makipaset iti Boxing sa Baguio Charter Day intun Setyembre uno a maisayangkat idiay Baguio Athletic Bowl.
Ti nasao a pasalip ket inorganisa ti sigud a Philippine National Boxing coach a ni Glicerio Catolico nga iti agdama ket agserserbi kas Tournament Director.
Sigun kenkuana nga agserbi kas additional exposure dagiti young boxers ti siudad nga agtawen iti 14-17 sakbay ti panagturong idiay Batang Pinoy National Championship intun Oktubre 25-31 idiay General Santos City.
Innayun pay ni Catolico a rumbeng laeng a maikkan iti adu nga opurtunidad dagiti atleta ti Baguio City a dakkel a katulungan da iti panagsagana iti nasao a Batang Pinoy 2025 nu sadino manamnama a dumar-ay ditoy ti agarup 15,000 nga atleta iti nagduduma a paset ti pagilyan.
Nagkumpirma met a makisalip iti nasao a pasalip dagiti boxing team ti Tabuk City ken Dagupan City.
Malaksid kadagiti agtutubo a boksingero ket posible a mainayun iti fight card dagiti boxers ti Philippine Navy nu sadino makalaban da dagiti boxers iti collegiate level wenno varsities ti UB Cardinals ken UC Jaguars.
