Imbinglay ni Carol Bimmawig Domogan, Punong Baranggay ti Dominican Mirador Barangay nga agtultuloy ti monitoring ken orientasyon nga ipatpatungpalda kadagiti pagadalan iti makasupanda kasuruno iti bullying incindent a napasamak iti maysa kadagiti pagadalan iti nasao a barangay.
Maipalagip a kinumpirmar ni Mayor Benjamin Magalong a tallo ti naireport a bullying incident iti siudad, maysa idiay Quezon Hill, Pinget , ken iti Dominican Mirador.
Iti pannakiuman ti Bombo Radyo Baguio kenni Domogan, kinunana a saan a daytoy ti umuna a kaso ti bullying iti masakupanna isu’t gapunna nga agtultuloy ti ipapaay dagitoy a counseling kadua dagiti social workers iti siudad.
Nangrugi ti apa dagiti estudyante iti uneg ti pagadalan partikular iti school covered court ngem nagtultuloy daytoy agingga iti ruwar no sadino nagdidinnangranda.
Sigun kenni Domogan, awanen dagiti mannursuro ken dadduma nga estudyante iti pagadalan idi napasamak ti insidente isu’t gapunna nga awan ti nang-anawa iti napasamak.
Sigun iti opisyal, elementary student a lalaki nga agtawen iti 12 ti biktima bayat a dagiti met karaman ket high school students.
Gapu iti daytoy, pinaayabanda dagiti parentes dagiti karaman iti napasamak iti barangay no sadino nacounsel metlaeng dagiti ubbing babaen iti social worker ken nabilinda a mangipatungpal iti community service.
Impeksa ni Domogan a mannarimaan ti minitoringda ken panangpallagip kadagiti nagannak a bantayan ken isuroda dagiti annakda.
Impettengna ti kinapateg ti papel dagiti nagannak iti panangsuro kadagiti annakda. Patien ni Domogan a nasaysayaat a nairamut dagiti ubbing iti spiritual nga aspeto tapno saanda a mapanunot nga agaramid iti ruar ti pagadalan.
Agtultuloy met ti panagmonitorda iti nasao a barangay nangnangruna kadagiti pasdek a mabalin a pagtatambayan dagiti estudyante. Imbinglay ni Domogan a kaduada metlaeng dagiti kapulisan manipud Baguio City Police Office 1.
