Mangnamnama ti Bureau of Fire Protection a bumaba ti kaso ti uram iti probinsya ti Benguet ita a bulan ti Enero nu idilig idi napalabas a tawen iti kapada a bulan gapu iti nalam-ek a panawen ita nga umuna a lawas ti Enero.
Iti panakiuman ti Bombo Radyo kenni Fire Chief Inspector Jesus D. Yango, dadaulo iti Bureau of Fire Protection iti Probinsya ti Benguet, nasayaat ti epekto ti nalamiis a panawen ita nga umuna a bulan ti agdama a tawen.
Saan a kas idi napalabas a tawen nu sadino idi bulan ti Enero idi tawen dos mil biente kuatro ket nagsasaruno ti grass wenno forest fires gapu iti napudot a panawen.
Innayon pay ni Fire Chief Inspector Yango nga idi bulan ti Enero idi napalabas a tawen ket adda ti napasamak a sangapulo ket tallo a non-structural fires ken innem nga structural fires.
Sigun kenni Fire Chief Inspector Yango, adda ti sangagasut ket tallo pulo (130) a non-structural fires idi napalabas a tawen ken uppat a pulo ket pito met ti nailista nga structural fires idi napalabas a tawen.
