Pangpangepen ti Bureau of Immigration (BI) a mangipila ti kaso kontra kenni sigud a presidential spokesperson Harry Roque a pimmanaw iti Pilipinas babaen iti iligal a wagas.
Daytoy ket kalpasan a nangisubmitir ti kampo ni Roque
iti counter-affidavit seknan iti reklamo a human trafficking kontra kenkuana a nanotarioan idiay Abu Dhabi, United Arab Emirates.
Sigun kenni Immigration Commissioner Joel Anthony Viado, nalabit a daytoy ti nangpalsipika kadagiti immigration clearance nga awitna tapno awaten ti nagturonganna a pagilian.
Gapu iti dayta, posible a sumango ni Roque iti falsification of public documents.
Iti agdama, makikikoordinar ti nasao nga ahensia iti Philippine Embassy idiay Abu Dhabi.
Awan pay ti komento ni Roque seknan iti panggep ti Bureau of Immigration.
