Agtaltalinaed nga Illegal drug-free ti Bureau of Jail Management and Penology Male Dormitory iti siudad ti Baguio.
Daytoy ket kasaruno ti pannakaipatungpal ti greyhound ti nasao nga ahensia idi September 16, 2025.
Ti greyhound ket maysa nga operasion babaen ti pannakitinnulong ti Philippine National Police ken Philippine Drug Enforcement Agency a mangsukimat kadagiti pagbaludan.
Sigun kenni Jail Officer 1 Ericson Mendoza, Persons Deprived of Liberty Data Management Officer Security and Control Section, adda ti maisaysayangakat a surprise greyhound iti dua a daras iti tunggal bulan.
Kinunana pay a maipatpatungpal ti greyhound tapno masigurado nga awan ti iligal a kontrabando a makastrek kadagiti pagbaludan.
Malaksid iti dayta, masigurado a natalged ti uneg ti selda, maliklikan ti aniaman nga iligal nga aktibidad ken masuportaran ti kampania kontra iti iligal a droga.
Dagiti iligal a kontrabando ket pakairamanan dagiti posible a makadangran kas ti iligal a droga, illegal weapons, natatadem a banag, Cellphone, ken dadduma pay.
Maibasar iti rekord dagitoy, kadawyan a makumkumpiskar ket dagiti nuisance contraband kas iti ballpen, lapis, kartib, ken dadduma pay.
Inlawlawag ni Mendoza ti rason nu apay nga adda dagiti nakumpiskar a nuisance contrabands gaputa sumagmamano kadagiti Persons Deprived of Liberty (PDL) ket naka-enroll iti Alternative Learning School (ALS).
Sigun kenkuana, maisubli metlaeng dagiti makumkumpiskar a nuisance contrabands no agklase dagitoy.
Iti sabali a bangir, bimmaba ti agarup 55% ti populasyon dagiti balud iti nasao nga ahensia.
Maibasar iti datos, dumandanon iti agarup 238 ti bilang dagiti Persons Deprived of Liberty (PDL) ita tawen, nababbaba ngem ti nasurok 400 idi napalpalabas a tawen.
Gapu iti panagbaba ti bilang dagiti PDLs iti nasao a pasilidad, naaramat dagiti tallo a selda kas classrooms,bayat a 24 a selda ti maar-aramat kas pagbaludan.//Bombo Noveh Organo
