Panggep ni Manjit Singh Reandi, ti presidente ken Chief Executive Officer(CEO) iti John Hay Management Corporation a mangiwayat iti cable car iti nasao a pagpasyaran tapno maadaan iti alternatibo a pagsakayan dagiti sumarungkar sadiay.
Sigun kenni Reandi, adda ti nakapatangdan a kompanya a nakasagana a tumulong ken intiresado para iti nasao a konsepto.
Inlawlawag ni Reandi nga iti agdama ket conceptual framework paylaeng ti adda kadakuada ken awan pay ti naaramid a plano nu sadino, adda metten ti nangipatungpal iti panagadal iti daytoy idi napan a tawen.
Nupaya kasta, kinuna ti opisyal a kasapulan pay dagiti sabali a kompanya iti mangipatungpal iti kanayonan a feasibility study.
Kagiddan dayta, impanamnama metlaeng ni Reandi nga awan iti maputed a kayo nu maipatungpal daytoy ken mangbirokda iti wagas tapno saan nakaro a maapektaran ti aglawlaw kaspangarigan maipatungpal ti proyekto.
Kabayatanna, mangnamnama ti opisyal nga adu ti umannugot iti nasao a panggep nangruna ket makitkita nga iti masakbayan ket saan a maliklikan ti nailet a gunay iti trapiko.//Bombo Noveh Organo
