Nainget a pinaglibakkan ti Ministry of Foreign Affairs and International Cooperation ti Cambodia nga adda sadiay ti business tycoon a ni Charlie “Atong” Ang, maikontra iti immunan a “raw information” ti awtoridad idi pagilian a Pilipinas seknan iti lokasyon ni Ang.
Kinumpirmar daytoy ti Cambodian Foreign Ministry babaen iti maysa nga social media post. Nailawlawag met laeng iti nasao a pablaak nga awan ti anyaman nga rekord ti iyuuneg ken iruruwar ni Atong Ang iti nasao a pagilian.
Mabasa metlang iti nasao nga statement nga inpablaak da daytoy tapno paglibakan dagiti media reports nga mangibagbaga nga nagturong ni Atong Ang idiay Cambodia, kalpasan iti report nga adda dagiti kapulisan manipud Pilipinas a nagturong sadiay tapno biruken ti nasao a pugante.
Sigun met kenni Interior Secretary Jonvic Remulla, respetuenda ti nasao nga statement ti pagilian a Cambodia seknan iti nasao nga isyu. Nupay kasta, impettengna nga agtuloy latta ti panangsapol dagiti kapulisan kenni Atong Ang. // Bombo Karen Calpoe Sapirao
