Sumagmamano a residente sadiay Kalinga ti nangrecycle kadagiti campaign materials nga inaramat dagiti kandidato iti panagkampanyada.
Daytoy ket tapno saan laeng a maiturong iti dumping site wenno mapuoran.
Sigun kadagiti environmental advocate sadiay Kalinga, nasaysayaat a marecycle dagiti nasao a posters ken tarpaulins kas ecobags tapno saan dagitoy a maiwara laeng iti aglawlaw a makaitunda iti polusyon.
Dagitoy met ti boluntaryo a nagikkat kadagiti daduma a campaign materials a saan a naikkat kalpasan iti campaign period ken iti naipaay a lima nga aldaw a grace period para iti panakaikkat dagiti amin a posters a naimuntar wenno naipaklat.
Kiniddawda met iti publiko a mabalin a maited kadakuada dagiti campaign materials para iti panakarecycle dagitoy.
Panggep dagiti environmental advocate a ti mapastrekan iti panakailako dagiti campaign materials kas ecobags ket maipaay kadagiti tattao nga agkasapulan.
Saan a mailibak a maysa kadagiti parikot kalpasan ti eleksyon ken dagiti nagado a campaign materials a maibelbelleng a mangnaynayun iti volume dagiti basura.
Gapu iti dayta, maad-adal no anya dagiti agbalin nga alternatibo a pakaaramatan dagitoy kas kuma iti industriya iti fashion wenno marecycle kas ecobags.
