Impeksa ni Atty. Jose Villacorta, ti Assistant Regional Director for Operations iti Department of Transportation (DOTr)-Cordillera a napateg ti naipatungpal a candle lighting iti paset iti kalsada idiay KM6 La Trinidad, Benguet idi Domingo tapno maipalagip iti publiko nangruna kadagiti motorista ti kinapateg iti safe driving wenno naannad a panagmaneho.
Iti mensahe ni Atty. Villacorta kabayatan ti panakaobserbar iti National Day of Remembrance for Road Crash Victims and their Families, impettengna a kas maysa nga agserserbi iti publiko ket rumbeng nga aramidenda dagiti banbanag mainaig iti panangipaay iti lisensya kasta metten ti kinapateg iti umno a proseso iti panangrehistro kadagti luglugan ken daduma pay.
Imbinglay ni Atty. Villacorta a maysa daytoy a kapamilya iti biktima iti vehicular traffic accident nu sadino, patienna a daytoy ti nagbalin a dalanna a sumrek iti sektor iti transportasyon tapno makaipaay iti tulong wenno panagbalbaliw seknan iti responsable a panagmaneho.
Maipalagip a ti disso a nakaitugkelan dagiti kandila idiay La Trinidad ket maibilbilang nga accident prone area.
Kagiddan dayta, kinuna met ni Land Transportation Office (LTO) Deputy Joey Franz Galeon a ti nasao nga aktibidad ket maysa a wake-up call kadagiti motorista seknan iti kinapateg iti panangikondisyonda iti bagi ken luganda sakbay dagitoy nga agmaneho.//Bombo Noveh Organo
