Plano ti Land Transportation Office (LTO) inton umay a bulan a multaen dagiti mangilako wenno mangirenta ti lugan nu saanda nga irehistro wenno ireport iti opisinada.
Sigun kenni LTO Chief Assistant Secretary Vigor Mendoza, mangiruarda ti memorandum maipapan iti baro a polisiya iti kabiitan a panawen.
Dinakamatna a maipatungpal ti online registration tapno nalaklaka nga aramiden dagiti agtagikua ti lugan.
Impetteng ni Mendoza a nasken a maipatungpal daytoy tapno maliklikan ti aniaman a parikut.
Imbinglayna nga adda ti maysa nga opisyal ti Land Transportation Office a napapatay ngem ti lugan nga adda pakainaiganna ket nailako wenno naiyakar iti dadduma a tao.
Malaksid iti daytoy, ti suspek iti napasamak a road rage idiay Makati City a ni Gerard Raymond Yu, maysa a chinese businessman, ket natiliw gapu iti panangpaltogna iti 65-anyos a motorista.
Sumangsango daytoy ti kaso a murder kalpasan a nabigbig nga isuna ti nangmaneho iti Mercedes-Benz sedan.
Nupay kasta, naduktalan a saan a ni Yu ti nakarehisto nga agtagikua iti nasao a lugan a karaman iti nasao nga insidente.
Gapu iti daytoy, pinaayaban ti Land Transportation Office ti registered car owner tapno ipalawagna ti pannakailako wenno pannakaiyakar ti nasao a lugan.
