BAGUIO CITY – Maisagsagana itan ti panakaipatungpal ti Cordillera Administrative Region Athletic Association wenno CARAA Meet a maangay ditoy siudad ti Baguio inton Pebrero 16-21.
Addaan daytoy iti tema nga “Stronger and Bolder, Soaring High Together”.
Manamnama a nasurok 6,000 a delegado pakairaman dagiti atleta ken coaches manipod Abra, Apayao, Benguet, Ifugao, Kalinga, Mountain Province, siudad ti Tabuk ken siudad ti Baguio ti makipaset iti nasao a torneyo dagiti atleta dagiti parapubliko a pagadalan iti rehiyon.
Agbalin nga inspirasyon dagiti partisipantes dagiti nakisalip iti Southeast Asian Games 2019 gaputa agbuya dagitoy iti opening program ti CARAA Meet 2020.
Puntirya met ti siudad ti Baguio a mapagtalinaed ti kampeonato iti nasao a torneyo.
Naipasigurado met ti seguridad ken kinadalus ti aglawlaw iti panakaisayangkat ti CARAA MEET para iti pagimbagan dagiti delegado.
