BAGUIO CITY – Malamlamayan iti agdama ti maysa a caretaker kalpasan ti aksidente a panakatnag daytoy sadiay Upper Camp Dangwa, Alapang, La Trinidad, Benguet itay kanikadua.
Nabigbig daytoy a ni Pimentel Apolonio Jr, 58 anyos ken residente iti nadakamat a lugar.
Nadiskobre ti ina ti biktima ti bangkay daytoy ken inyumanna iti regional crime laboratory office ti Police Regional Office Cordillera.
Indeklara ti nagresponde a medico legal officer a pimmusayen ti nasao a lalaki.
Kalpasan ti panaka-iproseso ti crime scene ket naduktalan a posible a natnag ti lalaki manipud iti kabite nga addaan kangato a 17 a kadapan.
Naduktalan iti imbestigasion a nagapo daytoy a nakiinum iti arak iti kaarubana sakbay ti pannakatnagna.
Nagdesisyon ti pamilya ti pimmusay a saanen a maipasidong ti bangkay iti autopsia.
