Naipatungpal ti case conference itay agsapa para iti pamilya ti biktima iti bullying a nabulag kadua ti Barangay Officials ti Barangay Upper Quezon Hill, Baguio City Police Office Station 1, City Social Welfare Development Office, ken pastor iti mismo a barangay no sadino natalantan ditoy dagiti pakaseknan iti pamilya ti biktima ken dadduma pay kas iti tulong a maipaay kadakuada, kasta metlaeng ti pakaseknan iti civil liability ti respondent.
Bayat iti case conference, naiyunay-unay ti ‘kusang-loob’ a panangtulong ti Barangay Official a maki-anak iti respondent iti kasapulan ti biktima gapu ta agingga ita awan pay ti umno a komunikasyon dagiti dua a partido.
Inlawalawag met ti CSWDO nga agsina ti intervention program a maipaay para iti dua a partido.
Iti eksklusibo a pannakiuman ti Bombo Newsteam kenni Liza Bulayungan, dadaulo ti CSWDO, nangipaay dagitoyen iti financial assistance para iti biktima kasta metlaeng iti assistance para iti psychological evaluation daytoy ken dadduma pay a kasapulan ti biktima bayat iti panagpaagasna.
Innayon pay daytoy a naipaayan metlaeng ti livelihood assistance ti nagannak ti biktima.
Inlawlawag daytoy a saan pay a ditoy nga agpatingga ti tulong nu diket tuloy-tuloy daytoy kasta metlaeng ti suporta para kadakuada.
Mangipaayda metlaeng iti kaskenan a suporta kadagiti karamans iti Pinget National High School bullying incident.
Kabayatanna, impeksa ti nasao nga opisyal a tallo ti nairekord ti opisinada a bullying incidents no sadino napasamak daytoy idiay Dominican Mirador, Pinget, ken Quezon Hill.
Iti sabali a bangir, agpalpallagip met dagiti otoridad iti publiko a saanda a mamati a dagos kadagiti agwarwaras a Gcash details a mangibagbaga a ti maurnong ket para daytoy iti pamilya dagiti biktima iti bullying
Kagidan daytoy dagiti panangaramat dagiti manggun-gundaway kadagiti insidente ti bullying kas iti insidente idiay Pinget.
Impeksa ti otoridad a nu kayat dagitoy a tumulong, mabalin a makikoordinarda iti Barangay wenno personalda nga ipaay dagiti tulongda kadagiti biktima.
Iti sabali a bangir, agyamyaman met ti pamilya ti biktima a naawaan iti maysa a mata gapu iti agtultuloy a maaw-awatda a tulong manipud iti publiko ken gobyerno.//via Bombo Noveh Organo