BAGUIO CITY – Ibalbalakad ti Social Security System (SSS) – Luzon North 1 Division a masarakan ditoy Baguio City ti temporaryo a panagbayad dagiti miembro ti ahensia kadagiti payment centers kasaruno ti panakairikep ti cashier section daytoy gapu iti panagpositibo iti COVID-19 ti maysa nga empleyado sadiay.
Sigun kenni Christian Andrew Rillorta, Regional Communication Officer ti SSS-Luzon North 1 Division, nairikep ti cashier section ti ahensia para iti disinfection ken swab testing dagiti nakapulapol ti kadwada a nagpositibo iti COVID-19.
Kinuna a gapu iti daytoy ket mabalin a kadagiti payment centers wenno iti SSS-La Trinidad branch office nga agbayad dagiti miembro iti loans ken kontribusyon dagitoy.
Innayonna a kabayatan ti panagbayad dagiti miembro iti napilida a payment center ket kasapulan nga agaramid dagitoy iti Personal Reference Number.
Maipalagip nga itay laeng nabiit ket inwaragawag ti SSS ti mandatory a panagaramat ti Personal Reference Number iti panagbayad dagiti miembro iti kontribusyon kas maitunos iti implementasyon ti Real-Time Posting of Contribution Payments Project ti SSS.
