BAGUIO CITY – Maisayangkat ita nga aldaw ti pilot testing iti cashless transaction iti Baguio City Public Market, partikular iti Bagsakan Area.
Iti panakiyuman ti Bombo Radyo Baguio, kinuna ni Market Superintendent Fernando Ragma Jr. a naiwarasen kadagiti dealers ti nasurok 300 cards para iti nasao a pilot testing.
Kinunana a panggep ti pilot testing nga obserbaran ken addalen a nalaing dagiti agbalin wenno tumaod a parikot iti nasao a wagas ti transaksion tapnu isagaanda dagitoy sakbay ti pormal a panakaiyusuat ti cashless transaction iti lokalidad.
Dinakamatna a ti payment solutions company nga SquidPay ti agserbi a service provider iti nasao a sistema ken mabalin nga agala dagiti dealers iti card kadagiti booths a maimuntar iti Bagsakan Area no interesadoda a makipasset iti pilot testing.
Maitunos ti pilot test iti tarigagay ni Mayor Benjamin Magalong a panakaipatungpal ti cashless transactions ditoy siudad kas addang tapnu malapdan ti panagwaras ti COVID-19 iti Baguio City.
Tartarigagayanna a maikkaten ti physical transaction iti uneg ti merkado publiko ti siudad.
Sigun pay kenni Ragma Jr., babaen iti baro a sistema ti transaksion ket maipanamnama ti kinatalged ti salun-at dagiti umili iti lokalidad nangruna dagiti makitatransaksion kadagiti dealers nga agtataud iti nagduduma a lugar nga agiturturong iti produktoda iti uneg ti merkado publiko.
