Naiturungen ni Cassandra Li Ong ita nga aldaw iti House of Representatives bayat a ni Shiela Guo ket naiturong iti Senado, sigun iti National Bureau of Investigation (NBI).
Kinumpirmar met ni Atty. Ferdinand Topacio, legal counsel ni Ong, ti pannakaiyakar dagiti dua nga indibidual.
Immunan a naipaayan dagitoy ti pammilin a maipasidong iti kostodia ni Ong gapu iti “contempt” a pammilin gapu iti agtultuloy a saanna a pannakipaset iti imbestigasion seknan iti krimen ti Philippine Offshore Gaming Operator (POGO).
Ni Ong ket otorisado a representative ti Lucky South 99, maysa a Philippine Offshore Gaming Operator (POGO) a na-raid idiay Porac, Pampanga bayat a ni Guo ket kabsat ni dismissed Bamban, Tarlac Mayor Alice Guo.
Ti pannakaiyakar ken pannakaiturong dagiti dua nga indibidual ket inaprobaran ti Department of Justice (DOJ).
Posible nga uppat a kaso ti maipila kenni Ong bayat a dua kontra kenni Guo.
