Dumanon iti dua pulo nga indibidual ti naireport a pimmusay idiay Bicol Ragion gapu paylaeng iti Severe Tropical Storm Kristine.
Sigun kenni Police Regional Office 5 chief Police Brigadier General Andre Dizon, pito kadagiti biktima ket manipud idiay Naga, lima manipud Catanduanes, uppat manipud Albay ken sag-maysa manipud idiay Camarines Norte, Camarines Sur, Sorsogon, ken Masbate.
Pimmusay dagiti biktima kalpasan a nalmes dagitoy, natupakan kadagiti natennag a sanga ti kayo bayat a dagiti dadduma ket pimmusay gapu iti panagreggaay ti daga.
Malaksid iti dayta, naireport metlaeng nga uppat nga indibidual ti mapukpukaw no sadino dua kadagitoy ket taga-Masbate ken sag-maysa met idiay Camarines Sur ken Albay.
Kabayatanna, impakaammo ni Office of Civil Defense director Edgar Posadas a nakairekord dagitoy iti sangapulo a casualties, dua ti nadangran, bayat a siyam ti mapukpukaw.
Dagiti pimmusay iti daytoy ket manipud Aringay, La Union; San Andres, Quezon; Albay; Naga City; Bagamanoc, Catanduanes; Caramoran, Catanduanes; ken Palanas, Masbate.
