BAGUIO CITY – Maipasidong iti maintenance dagiti closed-circuit television (CCTV) cameras, nangruna dagiti saanen nga agkurkurri nga immuntar ti Benguet Electric Cooperative (BENECO) iti aglawlaw ti siudad ti Baguio.
Impanamnama daytoy ni Rocky Aliping, presidente ti board of directors ti BENECO iti panagparangna iti sesyon ti lokal a konseho idi kalman kagiddan ti panangkunana a karaman iti katulagan a pinirmaanda ti panangmintinirda kadagiti CCTV cameras ken ti pangsanayda kadagiti agserbi nga operators dagiti nasao a kagawaan.
Kinunana a P20 million ti nabusbosda para iti panakagatang dagiti nasurok 100 a CCTV cameras nga indonarda iti siudad.
Naamuan a minuntaranda iti CCTV cameras dagiti 10 nga istasyon ti Baguio City Police Office ken mapattapatta a P1.5 million ti nabusbos iti tunggal istasyon.
Innayonna a pagtungtunganda pay ti kiddaw met laeng ti siudad a panakaimuntar ti high definition a CCTV cameras ti aglawlaw ti Baguio tapnu saan laeng a maaramat iti panagmonitor ngem ketdi, para iti panakaprebentar dagiti krimen.
