Impeksa ni Julius Santos manipud iti City Disaster Risk Reduction and Management -Baguio City (CDRRMO – Baguio City) nga agtultuloy ti monitoringda kagidan iti iseserek tiBagyong Rosal (International Name: Champi) iti uneg ti pagilian ita nga aldaw.
Iti kanito nga umuneg daytoy iti Philippine Area of Responsibility, maawagan daytoy iti nagan a Rosal , ti maika -16 a Tropical Cyclone a mapadasan ita a tawen.
Iti pannakiuman ti Bombo Radyo, kinuna ni Santos nga apaman a makitada nga umasideg daytoy iti pagilian, dagos a maipangato pay ti alert da iti siudad.
Kas panagsagana, imbinglay ni Santos a nakapag-assess da metten kadagiti nagduduma a babbarangay iti siudad ken nangipaayda metten kadagiti mapa ti lokasyon sadiay tapno nalaka a maamuwan dagiti pasdek a narisgo iti panaglayos ken panagreggaay ti daga.
Kabayatanna, nu maipapan met iti panaglayos, imbinglay ni Santos a sigun iti assessment da, ti kangrunaan a rason dagiti panaglayos ket ti pannakapullat dagiti waterways.
Impeksana met a mannarimaan ti panangtutokda kadagiti kangrunaan a lugasr a malaylayon kas iti City Camp Lagoon, Magsaysay, paset ti kalsada idiay Irisan, Lagoon 2 San Roque tapno saanen a mapasaran ti nakaro unay a panaglayos iti nasao a lugar.
Maysa metlaeng kadagiti bambantayanda ket ti panagreggaay ti daga ken fallen trees.
Mainaig iti dayta, kinunana nga agtaltalinaed a nainget ti panangipawilda iti panangibasura kadagiti pagnaan iti danum iti siudad.
Iti baet dayta, impeksa metlaeng ni Santos a nupay agtudo lakitdi saan kuma a napigsa, makatulong daytoy tapno makaurnong ti siudad iti kanayunan a suplay iti danum kas panagsagana metlaeng iti siudad iti posible nga epekto ti El Niño.
Nagbalakad met ti nasao nga opisyal iti publiko nga agsaganada latta ken agtulnogda nu adda dagiti abiso dagiti barangay officials kadakuada. //kcs//
