Impeksa ni Julius Santos manipud iti City Disaster Risk Reduction and Management -Baguio City (CDRRMO – Baguio City) a nasapa ti nagbalin a panagsagana ti siudad maipapan iti posible nga epekto ti El Niño.
Imbinglayna nga idi pay laeng Mayo ti agdama a tawen, naaddaanen iti Summit no sadino nailatag dagiti addang ken plano para iti epekto ti El Niño.
Iti agdama, na-activate metten ti El Niño Continuity Plan a maaramid kas panagsagana iti kanito a maksayan ti danum a maaramat iti siudad.
Malaksid iti dayta, napagsaritaan metten dagiti mabalin nge epekto daytoy iti dadduma nga aspeto kas iti salun-at, social, ken ekonomiya ti siudad.
Innayonna pay a babaen metlaeng iti koordinasyonda iti Baguio Water District (BAWADI), maiyuswat ti dashboard, maysa a monitoring platform no sadino makita nu kasano kaadu ti danum nga ipoproduce ti BAWADI.
Mannarimaan metlaeng ti panangicheckda kadagiti pasdek nga addaan iti leakage iti danum tapno saan a masayang daytoy.
Mangnamnama met daytoy a saan a makurangan ti siudad iti danum gapu iti nasao nga El Niño phenomenon.
Nupay kasta, impatalgedna nga apaman a mamonitorda nga agkurang ti danum, manbukel manen ti maysa pay a contingency plan ken saan nga urayen a maibusan iti danum.
Ginuyugoyna met ti publiko a nasaysayaat a mangrugi ita ket rugiandan nga agsalimetmet iti danum ken nu adda dagiti leaks kadagiti tubo da, dagosda nga ireport iti BAWADI tapno dagos a matarimaan.
