BAGUIO CITY – Sinuspindir ni Environment Secretary Roy Cimatu ti panakaisardeng ti amin nga aktibidad ken operasyon ti small-scale mining iti entero a rehion Cordillera idi kalman.
Iti press briefing sadiay Benguet Provincial Capitol, inwaragawag ni Cimatu ti ‘cease and desist order’ daytoy iti amin nga aktibidad ti panagminas iti rehion kasaruno ti epekto ti Bagyo nga Ompong iti munisipyo ti Itogon, sadiay Benguet.
Winaswasna pay ti temporary permits a napaay kadagiti 10 nga small scale miners’ association nga addaan ti small-scale mining contracts iti Cordillera epektibo idi kalman.
Kinunana a mangipatulod daytoy iti tropa manipud iti pulisya ken militar tapnu adda ti mangipasigurado iti implementasyon ti nasao a pammilin.
Dinakamatna a maipatungpal ti pammilin bayat a maur-uray ti panaka-aprobar ti aplikasyon ti munisipyo para iti Minahang Bayan.
Kidkiddawen met ti kooperasyon daigti minero nangruna iti Itogon para iti panangisardengda iti panagminas dagitoy.
Kabayatanna, kinanunungan ni Itogon Mayor Victorio Palangdan ti nasao a pammilin.
Nupay kasta, impettengna nga adda met dagiti natalged a disso sadiay Itogon a mabalin a pagminasan ken agdama a pagminminasan dagiti minero sadiay.
Kinunana a panagminas ti kangrunaan a pagbiagan dagiti umili iti Itogon.
Gapu iti daytoy, inyapela ti mayor ti panakaisayangkat ti technical conference tapnu maisimpa ti amin ken saan a maparigatan unay dagiti maapektaran a minero gapu iti nasao a pammilin.
Innayonna a namin adu daytoy a nagpatulong kadagiti maseknan nga opisina kas iti DENR ngem agingga ita ket awan ti naipapaay.
