Naiturong iti Alcoy Police Station ti nalatak a Cebuano vlogger a ni “Boy Tapang” kalpasan a nagreklamo ti live-in partner daytoy gapu iti panangkabilna kenkuana.
Daytoy ti kinumpirmar ni Police Capt. Jerry Magsayo, OIC- PNP Chief sadiay Alcoy bayat ti pannakiuman ti Bombo Cebu Newsteam.
Ni Ronie Suan, Alyas Boy tapang, 25-anyos ket inreklamo ti live-in partnerna a ni Cristina Morales, 21-anyos no sadino, inbagana kadagiti otoridad a kinabil daytoy ti nasao vlogger.
Nagturong ti biktima iti police station pasado alas 12 iti tengnga ti rabii ken inreportna ti napasaranna isu’t gapuna a dagus a nagresponde dagiti pulis.
Inlawlawag ti biktima a bayat ti kaaddada iti balay ti “Boy tapang’ ket adda ti saanda a nagkinnaawatan gapu iti vape a nasarakanna kadagiti aruaten ni “Boy tapang”.
Daytoy ti rason no apay a namin-adu a daras a kinabkabil ti suspek ti kannigid a takiag wenno abagana ti biktima, kannawan a paset ti tianna ken nagduduma a paset ti bagina.
Inbinglayna pay a saan a daytoy ti umuna a gundaway a dinangran ti suspek gaputa, napasaranna metlaeng daytoy bayat a masikong.
Nupay kasta, gapu iti buteng ken ayatna iti nasao vlogger, pinilina ti nagtalna.
Iti agdama, ti 25-anyos a vlogger ket nagpiansa iti P3,000 ita nga aldaw, Abril 3, 2025.
