Nagsubli iti pagtaenganda iti siudad ti Baguio ti celebrity mom ken negosiante a ni Neri Miranda kalpasan iti dua a tawen–maysa nga addang nga inladawanna a resulta iti tured ken in-inut a panagimbag manipud iti trauma a saannan nga impablaak.
Iti maysa kadagiti social media account ti aktres, imbinglay ni Neri ti panagbisitana iti Miranda Family Baguio Hillside Home nu sadinno makita nga ay-aywananna ti garden daytoy ken pinuros ti rosemary, lavender, ken sage. Sigun kenkuana, dua a tawenda a saan a nakasubli kalpasan ti maysa nga insidente idi naudi a nagsublida paturong iti asawana a ni Chito Miranda a nangitunda kenkuana iti trauma.
Inaklon ni Neri nga adda dagiti lugar a napataeg ngem mabalin a mangitugot iti nadagsen a “memories.” Para kenkuana, adda ti simbolismo dagiti mula a kas iti rosemary a para iti lagip, para iti panagdalus, ken lavender para iti kinatalinaay, a para kenkuana ket palagip a daytoy ket natalged ken agtultuloy a dumakdakkel iti baet ti pagdaldalananna.
Maipalagip nga idi tawen 2024 ket natiliw ni Neri seknan iti kaso nga estafa ken panaglabsing iti Securities Regulation Code ken naibalud iti Pasay City Jail Female Dormitory—maysa a kapadasan nga inawaganna a bangungot. Idi Marso 2025, naabsuelto ti amin a darum kontra kenkuana.
Iti udina, impapilit ni Neri a saan a mailako ti Baguio Hillside Home-da ken nagballaag kontra kadagiti scam. Para kenkuana, umdasen ti in-inut a panagrang-ay ken ti kaadda dagiti tattao nga agayat ken mangsalaknib kenkuana.
