Naituding a mangipatungpal ti Community Environment and Natural Resources Office (CENRO)-Tabuk City ken daduma a kameng dagiti otoridad iti census wenno imbentaryo kadagiti nagduduma a klase iti billet sadiay Tabuk City, Kalinga.
Iti inreport ni Jesse Maguiya,Tabuk City Public Information Officer iti Bombo Radyo, kinunana a ti census ket maipapan kadagiti water bird nga Egret wenno Kannaway a kadawyan a makitkita kadagiti taltalon.
Sigun kenni Maguiya,maipatungpal inton January 22 ti Information, Education and Communication (IEC) campaign maipapan kadagiti Kannaway iti Barangay Agbannawag, Tabuk City.
Daytoy ket tapno maipakaammo a maiparit ti panag-anop kadagiti anyaman a kita ti billet nangruna ta agbalbalinen nga “endagered” wenno mapukpukawen dagitoy.
Malaksid iti dayta, kinuna ni Maguiya nga addaan pay daytoy iti panggep a mangipalagip iti publiko seknan iti kinapateg iti panagsalwad kadagiti billet tapno mabalanse iti ecosystem gapu ta saan a mailibak nga agbalbalinen a moderno ti aglawlaw ken dumakdakkel ti populasyon dagiti tattao.
Kabayatanna,maisayangkat met ti census sadiay Barangay Bulo, ken iti nagbeddengan iti Barangay Cabaritan ken Barangay Tuga gapu ta kadagitoy a kadawyan a pakakitkitaan kadagiti Kannaway.//Bombo Mera Pacpacan
