BAGUIO CITY – Pimmusayen ti centenarian ken maysa kadagiti Igorot a beterano iti maikadua a gubat sangalubungan.
Pimmusay idi kalman ni Tuacan Barian iti tawenna a 100.
Maibasar iti rekord, ni Barian ket maysa a Private First Class iti E Company ti 2nd Battalion ti 66th Infantry Regiment, USAFIP-NL.
Naamuan a maysa daytoy a minero sakbay a simrek iti serbisyo militar.
Maitabon daytoy inton August 30, 2021 iti pagtaenganda sadiay Central Kapangan, Benguet.
Impeksa met dagiti adu nga umili ti panangsaludoda iti beterano gapu iti panagserbina tapnu maragpat ti pagilian ti panagwaywayas manipud kadagiti mannakop.