Inaklon ti chief accountant ti Department of Education a nakaawat daytoy ti P25,000 tunggal bulan manipod iti daydi Education Secretary ken Vice President Sara Duterte manipod Pebrero agingga Setiembre 2023.
Bayat ti panagdinggeg ti House Committee on Good Government and Public Accountability, kinuna ni Rhunna Catalan a saanna nga impagarup a “bribery” ti kuarta a naipaay kenkuana a mangpirma kadagiti report ti liquidation.
Sigun kenni Catalan, inawatna ti nasao a gatad iti daydi DepEd Assistant Secretary Sunshine Fajardo.
Idi nadamag ni Catalan iti nagtaudan ti gatad, kinunana a saannan a dinamag gaputa awanan daytoy iti tured a mangdamag.
Patien ni Catalan a naragsakan laeng ni daydi Education Secretary iti performance dagitoy isut rason a naipaayanda ti kuarta.
Patienna pay a saan a maibilang kas maysa a kita ti “bribery” ti panangipaay kadakuada ti kuarta, tapno mapilitan a mangpirma kadagiti liquidation reports.
Malaksid kenni Catalan, dadduma pay kadagiti sigud nga opisial ti Department of Education a nangibaga a nakaawat ti “allowance” manipod iti daydi Education Secretary ken Vice President Sara Duterte ket ni daydi Department of Education Director ken lawyer Resty Osias ken sigud nga Education Undersecretary Gloria Mercado.
