BAGUIO CITY – Boluntaryo a simmuko kadagiti soldado ken pulis sadiay Bontoc, Mountain Province ti maysa a child warrior wenno menor de edad a kameng ti rebelde a New People’s Army (NPA).
Nabigbig daytoy iti nagan a Ka Trese, 16-anyos, estudyante iti nasao a probinsia ken tallo a tawen a miembro ti komunista a rebelde, partikular ti Leonardo Pacsi Command.
Maibasar iti report, simmuko ti balasitang kadagiti otoridad imetna dagiti subversive documents ti NPA, uppat a cellphone, tallo nga M16, kwarta ken sumagmamano a writing paraphernalia.
Apaman a naipaima ti balasitang dagiti nasao a banag kadagiti otoridad ket natalimudaw daytoy a nangitunda tapnu dagusda nga itaray iti pagagasan.
Sigun iti child warrior, simmuko daytoy gapu iti nakaro a panakabannogna ken gapu iti panag-abuso a napaspasaranna iti ima dagiti padana a miembro ken kadagiti lider ti NPA.
Kinuna met ni Lt. Col. Narciso Nabulneg Jr., commanding officer ti 54th Infantry Battalion ti Philippine Army a ti nasao a balasitang a child warrior ti sibibiag a testimonya kadagiti kinaranggas nga ar-aramiden ti NPA nga uray pay kameng ti grupo ket ranggasan dagitoy.
Kinunana a panaglabsing iti RA 7610 wenno iti Anti Child Abuse Law ken iti human rights ti inaramid dagiti NPA iti nasao a balasitang.
Dinayawna met ti nasao a balasitang gaputa iti baet dagiti napasaran daytoy iti ima ti kimmappenganna a grupo ket nabaelan latta daytoy ti immikat ken nagsubli iti sidong ti umno a dana.
Kasaruno ti napasamak ket guyguyuguyen ni Lt. Col. Nabulneg dagiti nabatbati a kameng ti NPA tapnu sumukoda metten gaputa awan metlaeng ti serbina ken atiddog unay ti 49 a tawen a panagrebelde dagitoy.
