BAGUIO CITY–Nalidem paylaeng a mailukat ti nalatak a Children’s Park sadiay Burnham Park gapu iti panagraira ti COVID-19.
Sigun kenni City Administrator Engr. Bonifacio dela Peña, maingetan latta ti panagruar dagiti ubbing nga agtawen ti sangapulo ket lima nga agpababa.
Kinunana nga iti agdama ket saan paylaeng nga ipalubos ti lokal a gobyerno ti Baguio nga aglukat ti Children’s Park kagiddan ti panag-obserbarda iti sitwasyon ti siudad seknan iti panakalukkay dagiti pagalagadan.
Inyunay-unayna a maawatanna ti rikna dagiti nagganak nga agtarigagay nga mangipasyar kadagiti annakda nangruna kadagiti ubbing a makapaspasar iti Confined Syndrome gapu iti naunday a panawen a panakapupokda iti pagtaengan dagitoy.
Nupay kasta, impettengna a nasken a maipangruna latta ti kinatalged ti publiko.
Sigun kenkuana, nasken nga agaramid dagiti nagannak iti dadduma a wagas tapno saan a maburyong ken agaramid iti dakes dagiti ubbing kontra iti bagi dagitoy.
