Insubmitir ni Chinese Ambassador Jing Quan ti singasing iti Department of Foreign Affairs (DFA) a maaddaan ti common fishing area iti Bajo de Masinloc wenno pagaammo iti Panatag Shoal tapno mapalag-anan ti kumarkaro a tension iti mapagsusupiatan a taaw.
Panggep daytoy a tuladen ti naballigi a modelo, sangapulo a tawenen ti napalabas no sadino, naituding ti maysa a common fishing area.
Iti nasao a common fishing area, sitatalna nga agkalap dagiti mangngalap a Pilipino ken dagiti Tsino.
Impetteng ti Chinese envoy a no naaramid ti nasao a modelo kadagiti napalabas a dekada, apay kitdi a saan a maaramid ita.
Maipalagip a ti common fishing area iti nagbaetan ti China ken Pilipinas ket iti Scarborough Shoal a nabaknang iti coral.
Masarakan daytoy iti 120 nautical miles ti baybay ti Zambales nga agserserbi a traditional fishing ground dagiti mangngalap a Pilipino, Tsino, Taiwanese ken Vietnamese.
Kabayatanna, inrekomendar metlaeng ti Chinese envoy ti pannakapalawa ti panagtitinnulong iti joint oil and gas development kadagiti mapagsusupiatan a baybay, agraman ti agricultural investment, solar energy, waste-to-energy projects, ken electric vehicles.