Nangrugin ti military drills wenno panagsanay iti China iti aglawlaw ti Taiwan ita nga aldaw agingga inton Biernes, Mayo 24.
Kasaruno ti panagtugaw ni Lai Ching-te kas baro a presidente ti Taiwan ken ti panangawagna iti Beijing nga isardengda ti ar-aramidenda a pangta kontra kadagitoy.
Sigun iti Eastern Theater Command of the Chinese People’s Liberation Army (PLA), nangrugi ti joint military drills pakairamanan iti army, navy, air force ken rocket force kadagiti lugar iti aglawlaw ti Taiwan.
Manarimaan a maipatpatungpal ti panagsanay iti Taiwan Strait, kasta met iti amianan, abagatan ken daya iti Taiwan pakairamanan pay iti Taiwan-controlled islands iti Kinmen, Matsu, Wuqiu ken Dongyin.
Nakapokus ti nasao a “drills” kadagiti joint sea-air combat-readiness patrols, precision strikes kadagiti kangrunaan a puntiria, ken integrated operations iti uneg ken ruar ti island chain tapno masubok ti “joint real combat capabilities” dagiti puersa.
Iti agdama, awan paylaeng iti komento ti gobierno ti Taiwan.
Maipalagip nga inawagan iti China ni Lai kas “separatist” bayat nga insungbat met ni Chinese Foreign Minister Wang Yi a “disgraceful” ni Lai.
