BAGUIO CITY – Pormal nga iyusuat ti lokal a gobyerno ti Baguio ken ti Baguio Filipino-Chinese Community ti selebrasyon ti Spring Festival ken ti Chinese Lunar New Year 2020 ditoy siudad inton January 13.
Mangrugi ti aktibidad iti agsapa kabayatan ti flag-raising ceremony sadiay City Hall.
Sigun kenni secretariat head Pepito Avena, agipaay iti mensahe da Mayor Benjamin Magalong, Representative Mark Go, festival chairman Peter Ng ken adviser Kane Chanbonpin.
Ipalawag met ni Filipino-Chinese community officer Chino Chow ti kinapateg ti 2020 kas Year of the Rat.
Ipabuya ti Bell Church Athletic Group ti maysa a tradisyonal a Lion Dance ken maiparang iti publiko ti calendar of activities iti nasao a selebrasyon.
Karaman kadagiti aktibidad ti media fellowship night inton January 16; barangay gift-sharing inton January 21 ken dadduma pay.
Tampok iti malem ti January 27 ti Grand Colorful Parade sadiay Session Road.
Maipalagip nga impasa ti lokal a konseho ti Baguio ti Ordinance No. 18, series of 1999 nga opisyal a mangbigbigbig iti tinawen a panangobserbar ken panangrambak iti Chinese New Year ditoy Baguio ken ti panangsuportar ti lokal a gobyerno iti daytoy.
