BAGUIO CITY – Pormalen a naiyusuat ti tinawen a Christmas in Baguio idi kalman, December 1.
Narugian daytoy iti programa a naipatungpal sadiay Malcolm Square idi malem kalman a nakaipabuyaan dagiti nagduduma nga animation.
Napasilawan ti symbolic Community Bonfire sadiay Malcolm Square a pagrugian ti “The Parol Story” a tema ti Christmas in Baguio ita a tawen.
Maitampok iti nasao a tema dagiti tradisyon ken kultura ti Cordilleras.
Maimatangan met iti pasang-at iti Session Road dagiti nagduduma a parol nga addaan ti simbolismo.
Agleppas ti Parol Story iti rotunda sadiay Upper Session Road a pakakitaan met iti namaris a Christmas Tree ti Baguio.
Indauluan met dagiti opisyales ti lokal a gobyerno ti siudad ti panakapasilaw ti nasao a Christmas tree.
Kabayatanna, iti alas-singko idi agsapa, December 2 ket nailista ti panagbaba ti temperatura iti siudad ti Baguio ken nangangato a paset ti Benguet.
Iti datus ti PAGASA-Baguio, 13.O°C ti kababaan a temperatura.
Maipalagip a kadawyan a kababaan a temperatura kadagiti napalpalabas nga aldaw ken lawas iti BER Months ket adda iti 15°C-17°C.
Nailista met iti 5:40 idi agsapa ti 10°C a lowest temperature sadiay Atok, Benguet ken ti 15°C a lowest temperature iti La Trinidad, Benguet.
