Inkari ni Councilor Rocky Aliping, ABC President iti siudad a saan a maulit ti napasamak a panakalayos ti City Camp Lagoon idi Marso idi napalabas a tawen kalpasan ti napigsa a panagbayakabak iti tudo.
Iti panakiuman ti Bombo Radyo kenni Aliping, kinunana a mangipatpatungpal dagitoy iti nagduduma a measures wenno adding tapno maipasigurado a nadalus ti Camp Lagoon.
Malaksid iti dayta ket manarimaan ti panakaikarga iti screen kasta met a na-activate ti task force.
Sigun kenni Aliping, manamnama a pagsaritaanda ti maipapan iti Camp Lagoon inton sumaruno a lawas tapno inton panagtutudo ket saan daytoy a malayos.
Mapalpalagipan met ti publiko nga agbalin dagitoy a responsable kadagiti basurada tapno saan daytoy a maipullat kadagiti drainage.
Maipalagip nga idi napalabas a tawen ket nalayos ti Camp Lagoon kalpasan iti napigsa a panagbayakabak ti tudo ken gapu kadagiti ado a basura a naipullat iti drainage ket nalayos ti Lagoon kasta met dagiti lugan a nakaparada iti daytoy.
