Kiddaw ken mangnamnama ti City Council iti panakipaset ni Congressman Mark Go kadagiti sumarsaruno pay a maisayangkat a public consultation maipapan iti revised charter change ti siudad kasta met ti segregation of the 13 barangays.
Iti panakiuman ti Bombo Radyo kenni John Rhey Mananeng, Sangguniang Kabataan (SK) Federation President ti siudad, impeksana a dagiti maipatpatungpal a public consultations ket saan a politically- driven no di ket wagas daytoy tapno kitaen no anya ti pagsayaatan ti amin a partido nangruna dagiti maseknan.
Innayon ni Mananeng a daytoy ket tapno agbalin met laeng a katulungan kenni Congressman Go tapno adda a maiyaramid pay dagiti nasken a maisimpa iti nasao a gakat nangruna ket ado dagiti “lapses” ken ado pay dagiti saan nga uman-annugot.
Maipalagip nga idi napalabas a Biyernes ket naisayangkat ti maysa a public consultation maipapan kadagiti nasao a pakaseknan tapno maala ti kapanunotan ti publiko.
Malaksid iti dayta, napagtalantananda met laeng ti maipapan iti Baguio Sports Code, ti panangipaay ti barangay ti kanayunan a papremyo kadagiti atleta malaksid iti agtaud iti lokal a gobyerno ti siudad.//M
