Guyguyugoyen ita ti City Environment and Parks Management Office (CEPMO) ti siudad ti Baguio ti publiko a makimaymaysada iti panangaywan kadagiti waterways iti siudad malaksid kadagiti parke para iti panangsalwad iti aglawlaw ti siudad.
Inlawlawag ni Rhenan Diwas, head lawyer ti CEPMO a tarigagay ti lokal a gobyerno iti siudad a palawaen ti mannarimaan nga Adopt a Park Program ti siudad no sadino mairaman metlaengen ditoy dagiti waterways.
Impeksa ni Diwas a napateg nga ada dagiti kadua ti lokal a gobyerno ti siudad iti panangsalwad kadagiti waterways nangnangruna iti panangipatungpal kadagiti nagduduma nga aktibidad para iti panangprotektar iti agdama a sitwasyon dagiti uppat a kangrunaan a river system iti siudad pakairamanan ti Balili River, Bued River, Ambalanga River, ken Asin-Galiano River.
Innayon daytoy a dagiti makipaset kas ‘adopters’ ket saan laeng a makipaset kadagiti cleanup campaigns ngem pati metlaeng iti panangdesinyo ken panangmintinar iti vegetation kadagiti waterways.
Babaen kadagitoy, manamnama nga in-inot a maisubli ti napimpintas a kalidad iti danum kadagiti karayan ken waig.
Kinunana a dagiti interesado nga agbalin nga ‘adopters’ ket dumalan iti vetting process a kas iti dadduma a programa da tapno
maipasigurado ti komitmentda iti panakipaset iti nasao nga initiatiba kas partners wenno katulongan iti siudad iti panangsalwad iti aglawlaw.
