BAGUIO CITY – Mamati ni Baguio City Director PCol. Allan Rae Co nga adda ti unseen forces iti uneg iti City Prosecutors Office mainaig iti imbestigasyon ti kaso ni daydi alias “Buboy”, ti pito-anyos a lalaki a maatap a nagkettel iti bukodna a biag iti aparment dagitoy ditoy siudad iti Baguio.
Iti eksklusibo a pannakiyuman ti Bombo Radyo iti opisyal, kinunana a saanda nga inpakaamo kadakuada a nasukatan ti prosecutor a nakaiggem iti nasao a kaso.
Kinunana a naamuanda laengen ti nasao a banag idi napaayaban dagitoy para iti priliminary investigation ti kaso ken saanda nga ammo ti rason no apay a nasukatan ti prosecutor.
Gapu iti daytoy, impila ti BCPO idi kalman ti motion for inhibition iti City Prosecutors Office tapno maipaiman ti kaso iti Regional Prosecutors Office.
Mamati ni Col. Co a babaen iti naipila ti motion for inhibition ket maipaayan ti hustisya ti ipupusay ti pito-anyos nga ubing.
Impettengna a nasaysayaat nga maipaima iti Regional Prosecutors Office tapno agtulid a nasayaat ti nasao a kaso ken tapno mapunas dagiti kontrobersial nga isyu a maipabpabasol iti City Prosecutors Office.
Kinunana pay a resrespetuenna ti City Prosecutors Office ken saanna a kweskwestionaran ti kapabilidad ken integridad ti nasao nga opisina.
Maipalagip nga impila ti BCPO ti nagtutuon a kaso kontra iti agassawa a Dalipog ngem agingga ita ket awan paylaeng ti inpaay ti City Prosecutors a resolusyon iti nasao a kaso.
