BAGUIO CITY – Nailista ti Baguio City ti kangatuan a bilang ti tourist arrivals iti entero a pagilian gapu iti agtultuloy a panagrekober ti sektor ti turismo ti Pilipinas iti baet ti agdama a pandemya.
Kinuna ni City Tourism Officer Engineer Aloysius Mapalo a nakailista ti Baguio iti pakabuklan nga agarup 10,600 a turista a simmangbay iti siudad iti uneg ti makabulan manipud nailukat ti turismo ti Baguio.
Dinakamatna a manipud nailukat ti turismo ti siudad ket agarup 4,000 a turista ti simmangpet ditoy Baguio malaksid pay kadagiti do-it-yourself tourists a dimmanon iti agarup 6,700.
Impannakkelna nga iti datus ket kangatuan ti Baguio City iti tourist arrivals no idilig kadagiti dadduma a pagpasayaran iti pagilian a nangilukat metten ti turismo iti lugar dafgitoy.
Innayonna a nagduduma ti rason no apay nga adu ti turista ti nagturong ditoy siudad iti baet ti pandemya kas iti panagtalekda iti progresibo a contact tracing ken mass testing ti lokal a gobyerno, ti panakaipalubos dagiti do-it-yourself tourists ken ti panakakissay dagiti maikalkalikagum a dokumento kadagitoy.
Sigun pay kenni Mapalo, nainget latta ti panakasukimat dagiti dokumento a nasken nga isumitir dagiti turista a kayatda ti sumang-at ditoy Baguio.
Namnamaen pay ti lokal a gobyerno ti Baguio ti ad-adda a panagngato ti bilang dagiti sumangbay a turista ditoy siudad ita a holiday season.
Iti baet dagitoy, inaklon ni Mapalo a bassit ti nasao a bilang no idilig iti dumandanon 120,000 a kadawyan a bilang dagiti turista a mailislista ti siudad iti kapada a panawen tunggal umadani ti holiday season.
