Impalagip ti Civil Service Commission (CSC) kadagiti opisina ti gobierno a dagiti babbai nga empleado a biktima ti pannakaabuso ken kinaranggas ket maikari iti 10-day paid leave.
Ti nasao a leave ket karaman kadagiti dadduma pay a paid leaves kas nakalanad wenno naipaay iti Republic Act No. 9262 wenno ti Anti-Violence Against Women ken Dagiti Annakda (VAWC) Act ti 2004.
Nupay kasta, ti 10-day leave para kadagiti biktima ti kinaranggas ket “non-cumulative” ken saan a mabalin a pagbalinen a kuarta.
Ti pannakailaylayon ti sangapulo nga aldaw ket saan a mabayadan wenno masingir kadagiti dadduma nga earned leave credits, sigun iti nasao nga ahensia.
Maidagdagadag pay iti Civil Service Commission (CSC) a siguraduenda ti “confidentiality” maipapan kadagiti empleadoda a biktima.
Naobserbaran ti gobierno ti Pilipinas ti 18-day campaign kontra iti VAW, nga addaan iti tema a “UNiTEd for VAW-free Philippines,” manipud Nobiembre 25 agingga idi kalman, Disiembre 12.
Kabayatanna, maibasar iti rekord ti Philippine Commission on Women (PCW) , nakairekord ti 11,636 a kaso ti VAWC manipod Enero agingga Nobiembre a trenta iti agdama a tawen.
Ngem sigun iti PCW, ti kaso ti panangabuso kadagiti babbai ket agtaltalined a pakaseknan iti Pilipinas.
