BAGUIO CITY – Naiyusuaten ti Clean Rider” a kampanya ti Cordillera PNP.
Panggep ti kampanya a makabinnadang dagiti umili iti panakaprebentar dagiti krimen nangruna dagiti ar-aramiden dagiti suspek a nakalugan ti motorsiklo.
Pakabuklan a 462 a motorcycle riders manipud Baguio City ken Benguet ti nakipaset iti naggiddan a panakaiyusuat ti kampanya sadiay Camp Bado Dangwa.
Mamarkaan iti stickers dagiti motorsiklo tapnu matulongan dagiti pulis nga agbambantay kadagiti checkpoints a mangdetermina kadagiti lehitimo a motorcycle riders.
Maguyguyugoy ti panagaplikar dagiti amin nga addaan motorsiklo iti nasao nga sticker babaen iti panangisumitirda iti official receipt ken certificate of registration ti motorsiklo dagitoy, driver’s license ken dadduma a balido nga IDs.
Iproseso met ti pulisya ti aplikasyon ken iberipikarda no ti motorsiklo ket nairaman iti aniaman a panaglabsing iti linteg wenno krimen.
Sigun kenni PCSupt. Rolando Nana, regional director ti Cordillera PNP, ipakpakita ti kampanya ti natibker a commitment dagitoy iti panakapabileg ken panakabukel ti natibker a pundasyon ti kampanya kontra iti kriminalidad nangruna dagiti krimen a ti suspek et nakalugan ti motorsiklo.
Agserbi pay dagiti motorcycle riders nga addaan ti nasao nga sticker kas ‘force multipliers’ nangruna iti panang-asistar kadagiti turista ken dadduma a motorista babaen iti panagpatrolyada iti masakupanda a lugar.
