BAGUIO CITY – Naipasidong iti RT-PCR test wenno swab test dagiti naduktalan a nakapulapol ti umuna a kaso iti Delta variant ti COVID-19 a nailista sadiay Buguias, Benguet.
Sigun kenni Vice Mayor Dione Baucas, na-admit iti maysa a pribado nga opisyal sadiay La Trinidad ti 34-anyos a lalaki a residente ti Buguias gapu iti saan a nasayaat a rikriknaen daytoy.
Naipasidong ti nasao nga indibidual iti RT-PCR test ken sadiay a naduktalan a positibo iti COVID-19, partikular ti Delta variant.
Innayonna met a naimbaganen ti nasao nga indibidual.
Nupay kasta, inaklon ti bise-alkalde a saanda pay a naduktalan no kasano a nakaptan ti nasao a lalaki iti Delta variant.
Dinakamatna nga iti panakiumanda iti kapitan ti Barangay Bangao a nagawidan ti nasao nga indibidual ket naamuan nga agang-angkat daytoy ti prutas manipud sadiay lowland.
Innayonna nga agtultuloy ti contact tracing tapnu maamuan no adda pay dagiti dadduma a nakapulapol ti nasao nga indibidual.
Kagiddan iti daytoy, impetteng manen ni Vice Mayor Baucas ti panagtungpal dagiti umili ti Buguias kadagiti health protocols tapnu maliklikan ti panagwaras ti COVID-19 sadiay, nangruna ti Delta variant.
