Impetteng iti Commission on Audit (COA) a kasapulanna ti mapatta-patta a P2.2 bilion ken kanayunan a personnel tapno maisubli ti pre-auditing kadagiti proyekto iti gobierno.
Iti budget deliberations iti House Committee on Appropriations, kinuna ni COA Chairperson Gamaliel Cordoba a kurang ti personnel para iti pre-audit isut gapuna a nakapokus laeng dagitoy iti fraud audit kalpasan a naisayangkat dagiti proyekto.
Sigun kenni Baguio City Rep. Mauricio Domogan, mabalin a makatulong ti pre-audit kagiddan ti geotagging wenno mapping tapno maduktalan a dagos dagiti proyekto sakbay a mairuar ti pondo.
Kinuna iti COA a kasapulan daytoy iti 146 a kanayunan a pre-audit teams ken makikikoordinar metlaeng iti Department of Public Works and Highways (DPWH) para iti panagaramat iti geotagging.
Kabayatanna, impaganetget metlaeng iti COA ti kasapulan a kanayunan a capital outlay para iti teknolohiya, hardware, software ken digitalization tapno mapasayaat ti audit system ken mekessayan ti panagurnong kadagiti pisikal a dokumento.