Rimmuar iti 2023 Annual Audit Report ti Commission on Audit (COA) para iti Department of Public Works and Highways (DPWH) a P783,529,617.36 nga advance payments kadagiti kontratista ti saan pay a naala manipod idi maudi a paset ti agdama a tawen.
Dagiti pondo ket para iti 353 a proyekto ti imprastraktura a nalpas, “terminated”, wenno maur-uray a materminate ti kontrata.
Binallaagan ti COA a daytoy ket panaglabsing iti Revised Implementing Rules and Regulations (IRR) ti RA No. 9184 ken pakaigapuan ti peggad ti pannakapukaw ti adu a pondo ti gobierno.
Karaman kadagiti kangrunaan a natakuatan ti COA dagiti sumaganad:
₱388 milyon para iti 253 a nalpas a proyekto.
₱351.7 milyon para iti 94 a naterminate a proyekto.
₱43.7 milyon para innem a proyekto nga agur-uray ti pannakaterminate.
Dagiti saan pay nasubli nga advance payments ket mangipakita ti pannakapaay a mangkissay kadagiti bayad a nangibaon ti 15% a reduction manipod iti periodic progress payments dagiti kontratista agingga a naan-anay a mabayadan dagiti advances.
Karaman kadagiti isyu a linaon dagiti natakuatan ket ti saan a pannaka-forfeit ti advance payment bonds iti oras ti termination ti kontrata.
Kasta met ti kinakurang iti monitoring ken umno a panagkessay manipod kadagiti billing ti kontratista.
Saan metlaeng a kumpleto ti accounting records ken ti panaglista iti panagproseso dagiti claim ti kontratista.
Kasta met ti saan a nasubli nga advances ket mangpataud iti dakkel a gatad ti pondo ti publiko a saan a mausar ti gobierno para iti dadduma pay a napateg a proyekto.
Gapu iti daytoy, insingasing ti COA a kiddawen ti nasapsapa a panagbayad manipod kadagiti kontratista wenno i-forfeit dagiti nai-post a bond dagitoy.
Rumbeng metlaeng a rugian ti ligal nga addang kontra kadagiti agkedkedked nga isubli ti advances.
Nainget nga ipatungpalna ti panagtulnog iti IRR ti RA No. 9184 ken DPWH policies iti pannakaisubli dagiti advance payments.
Pasayaaten pay dagiti mekanismo ti panangmonitor tapno masigurado ti naintiempuan a pannakakissay dagiti advance manipud kadagiti progress billings.
Rumbeng laeng nga ipatungpalda dagiti probision ti kontrata a mangipalubos iti pannakakissay ti advances manipud kadagiti claim kadagiti dadduma nga agtultuloy a proyekto iti isu met laeng a kontraktor.
Masapul a maipatungpal dagiti administratibo a sansion kadagiti personnel a saan a mangtungpal kadagiti proseso ti panagsubli.
Kabayatanna, impadamag ti management ti DPWH nga agtultuloy ti panagregget a mangtaming iti isyu, pakairamanan ti panangipaulog kadagiti demand letters kadagiti kontraktor, pannakipagtrabaho kadagiti regional offices tapno maipatungpal ti panagkolekta, ken panangala kadagiti legal a remedyo.
Iti laksid dagitoy nga addang, impaganetget ti COA ti pannakasapul iti naing-inget a panagtungpal ken kanayonan a remedial actions tapno malapdan ti ad-adu pay a ballooning dagiti saan a maala nga advances.
