BAGUIO CITY – Nabuangay ti baro a motorcycle squad ti Traffic Enforcement Unit ti Baguio City Police Office.
Sigun kenni PMaj. Oliver Panabang, dadaulo ti nasao nga unit ti pulisya, naawagan ti nasao a team kas ‘Cobra Squad’ a namnamaenda a makatulong iti panakaipatungpal dagiti pagalagadan ken paglintegan iti trapiko ditoy siudad.
Kinunana a mapagnamnamaan ti ‘Cobra Squad’ iti traffic interventions ken dadduma pay a pagkasapulan para iti naannayas a taray ti trapiko kas iti panagbaklas ti plaka dagiti lugan nga iligal a nakaparada iti kalsada ken iti panakaiwanwan ti trapiko kadagiti kalsada a makapaspasar iti nailet unay a trapiko.
Innayonna a ti Cobra Squad pay ti dagus nga agresponde no adda ti aksidente iti kalsada ken dadduma pay.
Imbingay ni Panabang a nabukel ti Cobra Squad ti unitda gaputa saanda a kabaelan nga agresponde a dagus kadagiti amin a maiyaw-awag a reklamo wenno panagpaarayat iti opisinada.
Dinakamatna pay a ti Cobra Squad ket brainchild wenno ideya ni Police Colonel Allen Rey Co, direktor ti Baguio City Police Office para iti traffic enforcement.
