BAGUIO CITY – Dumanon iti uppat nga indibidual a nagipila ti Certificate of Candidacy (COC) ditoy siudad ti Baguio para iti masungad nga eleksion ti nangisanod iti panagkandidato dagitoy kagiddan ti maudi nga aldaw ti withdrawal with substitution idi kalman.
Iti interview ti Bombo Radyo Baguio, imbinglay ni City Election Officer Atty. John Paul Martin a tallo a nagpila ti COC para iti kina-konsehal ken maysa para iti kina-bise mayor ti nagsanod.
Kinunana awan ti nagbalin a kasukat da vice mayor aspirant Raymundo Vargas ken councilor aspirants Rodolfo Paraan ken Martin Ayungo bayat a sinukatan ti sigud a konsehal a ni Leandro Yangot ti nagsanod a ni Jessie Palos.
Sigun iti election officer, ipatulodda dagiti dokumento dagiti uppat iti Law Department ti COMELEC tapnu sadiay a matingiting no balido wenno saan ti impila dagiti nasao a personalidad.
Dinakamatna met a mabalin latta nga agsanod dagiti dadduma a nagipila ti COC dagitoy sakbay ti May 2022 National and Local Elections ngem awanen ti mapasamak a substitution.
Nupay kasta, linawlawaganna a mabalin a masukatan ti maysa a nagpila ti COC no daytoy ket matay wenno mabaldado (incapacitated) la ketdi adda ti partido ken kaapelyidona a mangsukat kenkuana.
