BAGUIO CITY – Masurot sadiay La Trinidad, Benguet ti agdama a coding scheme para kadagiti taxi iti Baguio City.
Iti interview ti Bombo Radyo Baguio, kinuna ni City Councilor Benny Bomogao, dadaulo ti Committee on Public Utilities, Transportation, and Traffic Legislation ti City Council a resulta daytoy ti naangay a panagtaripnongda iti lokal a munispyo ti La Trinidad.
Naisayangkat ti nasao a taripnong kasaruno dagiti reklamo a naawat ti siudad ken ti La Trinidad gapu iti intunda ti nagduma a coding scheme a saan a napadaanan dagiti drivers ken operators dagiti taxi.
Pinagyamanan ni Councilor Bomogao ni La Trinidad Mayor Romeo Salda iti kooperasion ken tulongda tapnu marisot ti nasao a pakseknan.
Immunan nga inkalintegan ni Mayor Romeo Salda ti panakatiliw ken panakaipaay ti citation ticket kadagiti taxi drivers a nagturong sadiay La Trinidad gapu iti panaglabsing dagitoy iti coding scheme ti munisipyo.
Kinunana a saan nga inkoordinar ti Baguio ti panagbaliw ti coding scheme ti siudad para kadagiti taxi units.
Inkalintegan met ti Baguio a nakikoordinarda met iti La Trinidad ngem awan met ti maaramidan dagitoy gaputa adda met ti bukod a pagalagadan ti nasao a munisipyo.
Kagiddan iti daytoy, kiniddaw ni Coun. Bomogao ti panagbalin a responsable ken panangited dagiti taxi drivers ken motorista iti kooperasyonda, nangruna iti panagtulnogda kadagiti linteg-trapiko.
