BENGUET- Posible a mailukat ti College of Medicine iti Benguet State University (BSU) intun sumaruno nga School Year.
Sigun iti Dean ti College of Medicine a ni Dr. Ruel G. Revilla, posible nga agrugi dagitoy nga umawat ti enrollees iti kanito a maalada ti lisensia.
Innayonna a 50 nga slots ti mailukat para kadagiti enrollees, maitunos iti rekomendasion ti Commission on Higher Education (CHED).
Sigun iti nasao a College Dean, mailukat ti nasao a kurso kas sungbat kadagiti pandemic issues no sadino, nagkurang ti Doktor partikular kadagiti probinsia ken munisipio ti Benguet.
Impetteng ni Dr. Revilla a kadaywan kadagiti Doktor ket nakatutok iti siudad.
Gapu iti dayta, 13 a mapili nga scholars ti nasao a College ket agsubli tapno ipaayda ti serbisio wenno maysa a tawen a residency iti nagtaudanda a Munisipio.
Kabayatanna, inyunay-unay dagiti Munisipio iti probinsia ti Benguet a maysa kadagiti ag-graduar ti alaen dagitoy nga agserbi a Doktor iti masakupanda, dipende iti pondo.
Babaen iti daytoy, maipaayan iti Doktor dagiti amin a Local Government Units (LGU) iti probinsia ti Benguet.//Bombo Noveh Organo
