Pormal a sumango iti General Court Martial ni Colonel Audie Mongao kalpasan a nakitaan iti umdas a basaran dagiti report a panangbawi daytoy ti suportana kenni Presidente Ferdinand “Bongbong” Marcos, Jr.
Iti maysa a press conference, kinumpirmar ti Philippine Army Chief Lieutenant General Antonio Nafarette a sanguen ni Mongao ti kaso a panaglabsing iti Article 63 wenno Disrespect towards the President, Vice-President, National Assembly under the Articles of War.
Sigun kenni Nafarrete, nalawag a saan a panagraem ti nagbalin nga aksyon ni Mongao.
Maipalagip a naikat iti puwesto ni Mongao kas commander ti Training Support Group kalpasan a nagwaras iti social media ti maatap nga panang-withdrawna iti suportana iti presidente. // Bombo Karen Calpoe Sapirao
