BAGUIO CITY – Agbalballaag ita ti Commission on Elections (COMELEC)-Baguio iti publiko kontra kadagiti indibidual a mang-pekpeke kadagiti dokumento manipud iti nasao nga opisina.
Sigun kenni Atty. John Paul Martin, election officer ti siudad ti Baguio, naduktalan ti opisina nga adda dagiti negosiante ditoy siudad nga agar-aramid kadagiti bogus a dokumento kas iti voters certification, official receipt ken dadduma pay.
Kinunana a posible a ka-konsabos dagiti negosiante dagiti barangay officials iti nasao nga iligal nga aramid.
Nupay kasta, kinunana a nakadkadlaw a peke dagiti dokumento gapu ta photocopy laeng ti langa dagitoy.
Inlawlawag ti opisial a bin-ig nga orihinal a kopya dagiti dokumento nga ipapaay ti COMELEC.
Kinunana pay nga adu dagiti security features iti maysa nga orihinal a dokumento, banag a saan a makita kadagiti peke a dokumento.
Kidkiddawen ti COMELEC ti tulong ti lokal a gobierno ken ti City Prosecutors Office para iti pannakaipataw ti pannusa kadagiti mangar-aramid kadagiti peke a dokumento.
