BAGUIO CITY – Nagbalin a generally peaceful ti naangay a Barangay ken Sangguniang Kabataan Elections ditoy rehion Cordillera.
Iti panakiyuman ti Bombo Radyo, kinuna ni Atty. Julius Torres, regional director ti COMELEC – Cordillera a nagbalin a natalinaay ti napalabas nga eleksion gaputa awan dagiti dadakkel nga insidente a napasamak iti rehion.
Kinunana a daytoy ket iti baet dagiti sumagmamano a pakaseknan a naireport iti opisina ti komisyon a kas iti damag nga adda dagiti grupo sadiay Abra a nangpwersa iti panagsanod ti sumagmamano a kandidato sadiay.
Dinakamatna a narisut met daytoy a parikot gaputa amin a baragay iti rehion ket nakaipatungpal ti eleksion
Kabayatanna, al-allukuyen ni Atty. Torres dagiti umili a nakaimatang iti vote buying tapno mangipila dagitoy iti pormal a reklamo iti maseknan nga opisina.
Sigun kenkuana, mabayag ti proseso ti pannakatingiting dagiti kaso ti vote buying gapu iti kinakurang dagiti testigo.
Inlawlawagna a kadawyan laeng a bin-ig a reklamo ti ar-aramiden dagiti umili ngem saan dagitoy a mangipil-pila iti kaso kadagiti maak-akusaran a kandidato ken kaaduan met laeng kadagiti botante ti agkedked nga agtestigo kontra kadagiti kandidato ken indibidual a naggatang iti botos.
Kabayatanna, ipalalagip ti COMELEC ti panangipila dagiti nagkandidato iti kalleppas nga eleksion iti Statements of Contributions and Expenditures (SOCE) dagitoy.
Sigun kenni Atty. Torres, saan a mapalubusan nga agtugaw iti takem dagiti nangabak a kandidato no saan dagitoy nga agipila iti SOCE.
Nangrugi idi kalman ti panagipila iti SOCE ken agleppas daytoy kalpasan ti 30 nga aldaw wenno inton Hunyo 13.